樂壇風雲

這首歌是近來最有火的一首，校長終於肯用多幾分真火，B哥哥亦冇交行貨，有氣勢，MIXING出色，好好聽，最重要也是填詞的「林敏驄」三個字。

這個人徹頭徹尾地瘋狂。《葉問風中轉》已抽光水塘，再來《樂壇風雲》一抽再抽，抽完歌手抽樂壇再抽歌迷，一開始歌詞已經句句有骨落地。串歌手偶像日日玩微博，串歌手個個扮做唱作人，串歌手偶像整容日日變樣，也不及OK仔一句唔岩音又無厘頭的「好多雀仔亂咁飛」，串時下歌手水準隨街可見，也串他們所唱的歌都係咁上下水平。

既然如此，何必多寫幾隻《幻影》、《霧之戀》？那是需要蝕骨之痛才能寫得出的情歌。

林敏驄老早回塘嗎？我不敢講，只是見最近兩首歌，總算是不愧鬼才之名。要證明一個人的價值，先想想有什麼人可以取代他。忘了一提，他的有味句子今次收歛不少，不然「有好多嘅歌迷幫我哋擔擔擔」應該是「有好多女歌迷幫我哋擔擔擔」……

樂壇風雲
作曲：陳奐仁 填詞：林敏驄
編曲：陳奐仁 監製：陳奐仁．溫拿

漫漫長夜 aoh-o～好多人投訴
跌咗本簿 aoh-o～搵乜都冇

咪怪我日日微博 只怪我最愛音樂
咪怪我結他得個殼 佢彈嘅係最好嘅音樂

咪hea爆掛住瞓晏覺 出街之前幫隻狗笠返個口罩
日子耐咗棚牙會冇咁哨 唔見咗嘢馬上周圍亂咁摷

好多雀仔亂咁飛
從前這樂壇 有好多嘢玩
樓下有好多女歌迷 幫我哋織冷衫
從前出唱片 啲人即刻翻版
而家cheap得過雞蛋 周街mp3

咪怪我日日微博 只怪我最愛音樂
咪見個女仔好鬼索 佢偷咗你支可樂

人生苦短幾十年 難得個個先苦後甜
到依家仲係勇往直前 有邊個會記得我哋曾經食過榴槤丫

好多雀仔亂咁飛
從前這樂壇 有好多嘢玩
有好多嘅歌迷 幫我哋擔擔擔
從前出唱片 啲人即刻翻版
而家cheap得過雞蛋 周街mp3

而家啲人好似好心急 一步登天你話得唔得
出嚟千祈唔可以亂咁噏 講錯說話又怕俾人扑濕
做新人邊可以懶到出汁 應該用吸星大法吸得就吸
初出道咪掛住依依泣泣 做咗天王你就乜都得

好多雀仔亂咁飛
從前這樂壇 好似冇咁慘
無論有幾多咁艱難 啲歌高幾班
從前出唱片（永冇失禮）啲人即刻翻版（真係好曳）
而家cheap得過雞蛋（睇到心翳）周街mp3（免費免費）

從前這樂壇（乜都肯制）有好多嘢玩（有得幾曳）
樓下有好多女歌迷（永冇失禮）幫我哋織冷衫（永冇亂吠）
從前出唱片（永冇失禮）啲人即刻翻版（真係好曳）
而家cheap得過雞蛋（睇到心翳）周街mp3

搵差人拉佢丫 拉佢老翻丫
好呀 好呀