戀愛總是平靜地意外身亡

女朋友一直嚷著要跟朋友看，票也一早買好。實在「W劇社」的票其實並不便宜，坐最佳的eye level位，索價三百六。

但是抵睇的，因為實在大龍鳳的很，舞台設計編排處處見精緻，衣服佈景燈光音樂視覺效果等等更是高水準，最重要是劇本做到大眾化，有野帶走但又唔太深師奶睇得明後生又唔嫌娘，即是有意思得來易消化，你估容易？也難怪梁祖堯有班固定fans，最勁也不是他的演技，而是他講對白的語氣及節奏。三粒鐘戲冇悶場，sad位多笑位又多，明明好眼訓又未食飯，我都睇得好投入，女友當然更加收曬貨，還已經揀定下一套戲……

關於故事，對我來說不是太深刻，有些感覺和情懷，大抵過了就很易忘記，說起來自己本是為愛而生，注定多愁善感，賣感性賣了多年，近來卻突然不懂感性為何物，所以也許與劇本無關，反正我就是不太有感覺，離場時耳邊只記得梁祖堯說過「鍾意一個人，實在太容易。」，與及那個「動物園愛情理論」：很多人都當了自己是安安、佳佳，冇得揀先響埋一齊，其實是有得揀的，只是你喜歡留在動物園，因為有安全感，而不敢走出森林，找真正適合自己的那個人。

我不算舞台劇fans，肯定揀過諗過才有興趣睇，所以每次都冇失望。如果再公演，未睇過的朋友絕對可以考慮獻出你第一次俾《戀愛總是平靜地意外身亡》，最少人好睇歌好聽，睇完你就明點解固定有班人肯俾幾舊水睇幾條友響個台到做幾粒鐘戲。