《超人:鋼鐵英雄》大失所望

Man of Steel

 

“My father believed that if the world found out who I really was, they’d reject me… out of fear. He was convinced that the world wasn’t ready. What do you think?" – Man of Steel(2013)

忘記了上一套《超人》電影有多爛了,反正今次再一次restart,有Zack Snyder導演,加Christopher Nolan編劇,我很有期待。

滿心歡喜,甚至說服了很多人,這套會是今年最好的電影之一(因為剛好遇上《World War Z》……這套戲我暫時沒寫,但你知道的。),叫大家必定要看。看罷,兩個字可以形容:「中伏。」

有些電影注定是小數人玩意,例如《人形蜈蚣》、《力王》之類,剛好對到頻率就注定一世難忘,但多數有這類特質的電影都可以叫cult片,《超人:鋼鐵英雄(Man of Steel)》明顯不是cult片,如果看罷所有宣傳片,對其印象應該是商業、劇情又有點娛樂那種蝙蝠俠式的英雄片,問題是,最終結果這部電影竟然非常之cult。我在Facebook才說了不多不少的七句,已經有死忠急不及待打上近千字的文章來告訴我「只是你看不懂」,剛好這blog實在荒廢太久,讓我忍不住要為此留下記錄,讓有緣者參與一番……

乾脆直接入主題。本片唯一可取,是特技,與及打鬥方面有新鮮的想法,以往這類英雄,往往飛天遁地無所不能,但「打大佬」時永遠都是近身爛仔拳頭交,例子多不勝數,但《Man of Steel》顯然也覺得這樣子非常之蠢,結果,電影中的超人對戰,用了超人的方式去做,「龍珠」一樣的空中追擊、飛出宇宙、高速移動中交戰,非常之刺激,鏡頭、畫面處理上亦有很多新意,這方面肯定是經驗豐富的Zack Snyder最大功勞,另外,美術設定雖未致於帶出新基準,但勝在一切都details,那些高科技的東西如何運作、機械結構如何,你幾乎看得出所有的東西都可以緊接推出一系列玩具……

要讚的就這樣了,缺點呢?頭段剪接明顯太速,只想盡快入到戲肉,一切事情的發展理所當然得太過份(超人一定要救地球?),麻煩觀眾自行補完。一個細細個開始質疑自己身份足足三十三年的…呃,「毒男」,冇朋友冇正常社交冇生存目的,突然見返佢老豆(自稱),響毫冇情感交流之下,無啦啦著起一件奇裝異服,然後,即時迫觀眾一齊投入佢個世界:「我開始搵到自己啦!」試飛、試自己能力、試投入做神的情緒,觀眾見超人成個笑曬冇煩惱,結果前段一切關於小時候的劇情,例如自我探索、否定自我、發現自己與世界有所分別的矛盾等等可以好深奧、好有劇情的題目,變成不值一提。--你想我點投入?

後段劇情,仍然保持跳躍式分鏡--並非回憶、現實穿插那種「係咪你睇唔明?」的節奏,而是突如其來變成下一幕的那種剪接--似乎每個鏡頭都有關係,但其實完全不理脈絡,感覺就是但求快手講埋個故仔,又矛盾在節奏奇慢,由外星人襲來開始,明顯已經見到無劇力可言,偏偏又要拉觀眾齊齊「死唔斷氣」,點名請一個地球人上太空船原因不明(按:原因她是女主角,OK),地球人因此成為對抗外星人關鍵同樣是理所當然,幾段打鬥上文已讚,即使發展奄悶也可以當視覺娛樂,然而最後一幕竟然多餘到插入超人內心戲,明明早一分鐘前全美國甚至全地球,也因為你一個人要同人打交而全部變成廢墟,那看不見的死傷難道就不是人?看得見的人才有阿媽生嗎?最終只讓人覺得,「_你!可以一早扭爆佢個頭,點解仲要打咁__耐??」更甚是,電影已經交待過超人有人類本性,並非像外星人般冷血,但其實最終戰鬥,你不時可以見佢瀟瀟灑灑chok一下避開一架貨車,由得佢炸爛後面棟大廈,或特登飛入鬧市務求自己高速飛過後可以整爛曬所有大廈既玻璃令個畫面震撼D……

當電影的世界觀與觀眾的世界觀不斷互相矛盾,其實,你想我點投入?

我的結論是,加入Nolan做編劇非常之錯,明顯見到他的風格和Zack Snyder格格不入,若以本片的劇情看,單純讓Zack Snyder一個話事,電影應不致於如此笨拙(很多劇情上的「cult」,我已經乾脆不說了)。如果《Man of Steel》的定位只是給「超人」fans圍威喂集體打幾下飛機,反而顯得本片失敗到極。好的改編電影,最少要吸引到局外人看完後還有心去了解原著,例如Marvel一系列的改編,不見得很深奧經典,也起碼有這種效果,相反,這套電影卻令我也許不敢再「試」《超人》這個title……

前文說有死忠忍不住回應我,雖然他顯然搞錯了討論重點,但我也在末段節錄一些讓大家參考。

「其實今次電影既風格,正正對應了DC漫畫於2012年NEW 52年代的風格。你唔理解為何Clark的養父會教導佢要忍耐,唔好隨便使用超能力,係因為佢認為世界未準備好接受超人類的存在。當超人類陸續出現於公眾面前,世人會抱有不安和不信任的感覺,政府亦不會友善對待超人類。

DC於NEW 52計畫後,重整DC漫畫世界觀,新世界中,一眾超級英雄依然活躍,但人類並不能完全信任他們,除左面臨人民的質疑,政府都對超人類採取監視,甚至對抗的態度。正義聯盟並不受到政府的信任,英國政府亦建立了一隊『美國正義聯盟』,藉此抗衡正義聯盟。

華納同DC現在著手建立既世界觀,亦正正會這樣的一個世界。你認為睇咁多動漫,電影既人類,真係會咁從容面對一個超級英雄與超級罪犯橫行的世界嗎?

當然,Clark只係剛剛出道,面對水準與自己相若的對手(應該話係遇到自己同鄉),佢只能夠專心應付戰鬥,畢竟一分心,佢就好可能會失敗,所以佢唔懂得將敵人引導到遠離人群的偏遠地區,亦情有可原。還有,我認為這是故意安排的伏線,正如我之前所言,因為超人在這次戰鬥中帶來的破壞,正正令人類對於超人類既存在產生不信任和恐懼,日後會藉此帶出數個重要的原素,例如政府的介入,亦會帶出超人一生的宿敵-Lex Luther為何會視超人為巨大威脅,並且如斯執著要對付他。」

好吧,我真的希望這系列會有續集,好讓那個什麼Lex Luther亮一亮相,假如再要restart一次,也太樣衰了。

Official website:http://manofsteel.warnerbros.com/

7 thoughts on “《超人:鋼鐵英雄》大失所望

  1. 我今日睇左第2次,嘗試幫套戲辯護一下…

    纏繞住超人身份問題,主要有二:
    1.自己究竟係咩人?點解與眾不同?係咪嚟拯救世人?
    2.如果係救世主,幾時先係時機?
    第1個問題係天生,第2個問題係養父提出

    而見到生父後,佢終於知到自己嘅生世,
    同時佢堅持嘅行善信念亦為認同,
    “"「我開始搵到自己啦!」試飛、試自己能力、試投入做神的情緒""
    當一個纏繞左自己三十三年嘅問題得到解決,當然如釋重負,
    令佢變到咁HIGH我又覺得冇乜問題
    (“響毫冇情感交流"尼樣我都認同)

    不過,到尼到只係解決左問題1,仲有問題2
    即係身世問題解決左,身份問題仍在,
    佢仍然未肯企係世人面前,
    尼個決定,係佢養父犧牲自己性命去幫佢下
    佢所以當女主角搵佢佢拒絕曝光,
    當ZOD搵佢佢都係到掙扎過,搵神父告解過,
    最後決定企出嚟先算係完晒成個"自我探索"過程

    “點名請一個地球人上太空船原因不明(按:原因她是女主角,OK)"
    尼樣套戲已經有解釋…
    一返到落地球,LOIS已經向超人道歉
    大致話"外星人睇過自己D記憶,泄露左關於佢嘅情報"
    唔好唔記得ZOD其實唔係真係搵超人,而係搵法典
    而LOIS係已知唯人認識超人嘅人類,所以先叫佢上船套料…..

    「_你!可以一早扭爆佢個頭,點解仲要打咁__耐??」
    尼個問題,等於問日本特攝超人點解唔一出黎就出死光一樣…
    點解係咁,唔洗解啦…
    當然,我都覺一下拎死係有D兒戲嘅

  2. 仲有一樣野,
    點解個個都話最後大戰實死好多人?
    其實部打摏機一開,D人都嚇到係咁走
    然後到打摏機塌左,其實都冇影到幾多個人剩
    成個城只係得莫非斯同主角們,
    之後係D OFFICE 到穿插,都見唔到人

    到最後係個HALL到
    “超人內心戲",我唔太肯定你所指
    我自己理解佢嘅吶喊係因為佢親手殺死世上唯一一個同類…

  3. 其實,套戲就咁用文字交待返,你會覺得其實冇乜問題,問題其實係電影鏡頭點處理。
    好簡單,其實佢老豆寧願犧牲自己,都唔想佢響時機未成熟既情況下,響眾人面前顯示能力,以死話俾自己個仔聽,佢有更重要的使命同責任等緊佢。有個好重要的前提係,套戲一早就已經假設同肯定左,世界上係冇任何人接受到身邊有一個超人(但其實呢個前設係自打咀巴,當然,唔好太認真深究了),當我接受左呢個「前提」都好,果場戲既戇尻程度仍然係今年十大最爛電影場面,不如諗下點解會咁?

    其他我唔滿意既情形亦都係一樣,你「文字化」套戲,本身真係冇問題的,連反派都係有血有肉有情有義,佢甚至唔算係壞人,但電影又如何呢?出到黎,呢個反派形象完全唔能夠稱得上係成功,又點解會咁?

    我單純係一個電影觀眾,電影比到咩我,我就消化D咩。我重申,要觀眾完場後仍然有興趣回味同補完相關資料,係電影既責任,正如我聽演唱會,歌手唱得走音甩拍,我唔可以用「其實佢都採排左三個月」然後叫自己應該接受人地有努力過。

    最後大戰的確冇講到係咪真係死好多人,但點解我地又會覺得一定係死好多人?問題就係出響電影風格度,所以打最後大佬之前,其實已經用左成100分鐘去引導觀眾諗如果現實生活、城市真係受到外力破壞會點……我點解會話Nolan果套係唔岩用響呢套戲度就係咁解(蝙蝠俠入面死一船人已經係高潮戲,呢套係講緊外星人幾分鐘炸爆地球都好似係理所當然……)……

    但有D位我係認同你的,有心的討論,謝謝指教。

發表迴響

在下方填入你的資料或按右方圖示以社群網站登入:

WordPress.com Logo

You are commenting using your WordPress.com account. Log Out / 變更 )

Twitter picture

You are commenting using your Twitter account. Log Out / 變更 )

Facebook照片

You are commenting using your Facebook account. Log Out / 變更 )

Google+ photo

You are commenting using your Google+ account. Log Out / 變更 )

連結到 %s